Ազգային գրադարանային շաբաթ

Ազգային գրադարանային շաբաթվա շրջանակներում Արարատի մարզային գրադարանը հյուրընկալել էր երգիչ, դերասան Հայկ Պետրոսյանին։

Հանդիպումը կրում էր «Երգխոսություն Կոմիտասի մասին» խորագիրը։

Ցերեկույթը վերածվեց հոգևոր ու մշակութային գեղեցիկ տոնի։ Հայկ Պետրոսյանը ներկայացրեց Կոմիտասի հարուստ ստեղծագործական ժառանգությունը՝ անդրադառնալով նրա կյանքի ուղուն և ազգային երգարվեստում ունեցած անգնահատելի դերին։

Հատուկ շեշտադրվեց Կոմիտասի ձայնաշխարհը՝ նրա մեղեդիների խորությունն ու հոգևոր ուժը, որոնք մինչ օրս հնչում են որպես հայկական ինքնության կենդանի արձագանք։

Միջոցառման ընթացքում հնչեցին Կոմիտասյան երգեր՝ Հայկ Պետրոսյանի կատարմամբ՝ լցնելով դահլիճը ջերմությամբ, հուզումով և ազգային ոգով։

Հանդիպումը միավորեց ներկաներին Կոմիտասյան երաժշտության կախարդանքի շուրջ։